నిరీక్షణ   

ఆమె ఎదురు చూస్తుంది 

నిలువెల్లా పడిన  ముడతలనే 

కళ్ళల్లో వత్తులు  చేసుకొని 

ఆమె ఎదురుచూస్తుంది

డాలర్లమేతకు వెళ్లిన వలసపక్షి 

ఎన్నేళ్ళయినా కన్నవారినీ ఉన్న ఊరినీ

కడగంటైనా చూడనపుడు 

విరామమెరుగని 

ఎదురు తెన్నులే మిగిలాయి    

మస్తిష్కపు చరవాణి పంపిన 

వేనవేలు సందేశాలు 

అందే ఉంటాయన్న ఆశతో 

ఆమె ఎదురుచూస్తుంది

అనంత సాగారాలకావల 

ఉజ్వలంగా వెలిగే స్వేచ్చా జ్యోతులను 

తీసుకు వస్తాడని ఆశతో కాదు

చిక్కి శల్యమైన శిదిలాలయాన 

చిరుదివ్వె వెలిగిస్తాడనే కోరికతో 

ఆమె ఎదురుచూస్తుంది 

ఉన్నపళంగా వెళ్ళాలనే ఆత్రంలో 

విలువైనవే మర్చిపోయాడు 

సావాసగాళ్ళతో ఆడిన కోతికొమ్మచ్చి 

ఇంటిముందున్న చెట్టుకొమ్మపై 

జ్ఞాపకమై వేల్లాడుతోంది 

ఊరి కోనేటిలో 

ఈదులాడిన బాల్యం

చేపపిల్లలై  ఎదురుచూస్తున్నాయి 

చిన్నిపెదవులను తాకిన 

ఆమె బొటనవేలు

ఇప్పటకీ మారాం చేస్తుంది 

కొడుక్కి

గోరుముద్దలు తినిపించాలని

ఎప్పటికైనా వస్తాడనే ఆశతో 

తనువంతా ప్రాణమై 

ఆమె ఎదురుచూస్తుంది