భావగీతం 

చుక్కాని కరువైన చిరునావలోన 
దిక్కేదొ తెలియని నా జీవితాన 
వెలుగైతివే నీవు మెరుపైతివే
 కనుతెరిచినంత కనుమరుగైతివే  

నీవు చూసేచూపు నిశిరాత్రి వేళ 
నిదురలేపీ నన్ను పలుకరిస్తుంది 
నవ్వుతున్నా ఏరు నా తీరు చూడ 
ఆకాశ అద్దాన జాబిలయ్యింది                "చుక్కాని "

నీ నుదుట కుంకుమై నే నిలువగానే 
సూరీడు ఈసుతో  నన్ను చూసేను 
తెరచాప మాటునా నీవు దాగున్నా 
సిగలోన మల్లియలు నిను దాచలేవు      "చుక్కాని" 

పొగచూరిన జీవితాలు 

అగచాట్లకు ఆనవాలు

 పవరఫుల్ బైకులతో 

లవ్వర్ తో రైడింగులు 

మితిమీరిన గమనాలు 

అతివేగపు సాహసాలు 

కళాశాల చదువంటే 

కులాసాల సంబరాలు 

నిదురనుండి లేస్తూనే 

సెల్లుఫోను గిల్లుకుంటు 

ఏండ్రాయిడ్ మందిరాన 

ఫేసుబుక్కు దర్శనాలు 

ప్రేమంటే యాసిడ్లూ

 ప్రేమంటే కత్తిపోట్లు

 ఎదిరించే లేడి కూన

 తెగనరికే కర్కశాలు 

 ఇదేనా ఇదేనా 

పరుగెత్తే యువవాహిని 

మనకిచ్చే సందేశం 

కనిపెంచే మాతృమూర్తి 

కన్నీట్లో మునుగుతున్నా 

పెంచుకున్న ఆశలన్నీ 

 ఎండమావులవుతున్నా

మీ మనసులు మారవా 

ఆగడాలు ఆగవా  

మోసపోయా ... 

నీవు 

దాహార్తితో 

తపించినపుడు 

నా వళ్లంతా 

ఒయాసిస్సులే 

నేను 

జీవన కాసారానికై 

నీ దరికొస్తే 

నీ మనసంతా 

మరీచికలే